ഫാദേഴ്സ് ഡേ.

 ഫാദേഴ്സ് ഡേ ആണത്രേ !!!!

ഒരു ദിവസം ജോലിയുടെ ഭാഗമായി അബുധാബിയിലെ ഒരു ബില്‍ഡിംഗ് ചെക്ക് ചെയ്യാന്‍ പോയി .

,വാച്ച് മാന്‍ ഒരു മലയാളി ആയിരുന്നു .റൂഫിലെ ചില്ലര്‍ പരിശോദിക്കണം ചാവി എടുത്തു കൂടെ വരണം എന്ന് പറഞ്ഞപ്പോള്‍ പുള്ളിക്കാരന്‍ പറഞ്ഞു , ''മോനെ എനിക്ക് കോണി കയറാന്‍ വയ്യ!! കാലിന്റെ മുട്ട് മടക്കാന്‍ വയ്യ ,നിങ്ങള്‍ പോയി നോക്കിക്കോളൂ ''എന്ന് പറഞ്ഞു ചാവി തന്നു .

കണ്‍തടങ്ങളില്‍ കറുത്ത പാട് വീണ ആ വ്ര്‍ദ്ധന്റെ മുഖത്തു തന്റെ നിസ്സഹായവസ്ത പ്രകടമായിരുന്നു .

ഞാന്‍ ചെക്കിംഗ് കഴിഞ്ഞു ഇറങ്ങി റിപ്പോര്‍ട്ട്‌ എഴുതിക്കൊണ്ടിരിക്കുമ്പോള്‍ പുള്ളിക്കാരന്‍ ഒരു കസേര ചൂണ്ടിക്കാട്ടിക്കൊണ്ട് ഇവിടെ ഇരുന്നോള്ളൂ എന്ന് പറഞ്ഞപ്പോള്‍ അവിടെ ഇരുന്നു .

ഇരിക്കുന്നതിനിടയില്‍ ഞാന്‍ ചോദിച്ചു എവിടെ നാട് എന്ന് . 

മലപ്പുറം ജില്ലയിലെ ഒരു സ്ഥലത്തിന്റെ പേര് പറഞ്ഞു . ഞാനുമായി വളരെ അടുത്തുള്ള സ്ഥലം .കാല്‍ മുട്ടിനു അസുഖമുള്ളത് ആരെയും കാണിച്ചില്ലെ എന്ന് ചോദിച്ചപ്പോള്‍ അദ്ധേഹം പറഞ്ഞു ,''കിളവനായ കാല്‍ മുട്ടിനെ ചെറുപ്പക്കാരനാക്കാന്‍ ഉള്ള മരുന്നൊന്നും ഇവിടെ ഇല്ലല്ലോ!!, അവര് കുറെ വെദനക്കുള്ള ഗുളിക തരും രാവിലെ കച്ചറ(വേസ്റ്റ് ) തട്ടി ത്തീരുംപോഴെക്കും ആ ഗുളികയുടെ ശക്തി തീര്‍ന്നു വേദന തുടങ്ങും !!!''.

പതിനെട്ട്  നിലയുള്ള ആ ബില്‍ഡിങ്ങിലെ ക്ലീനിംഗ് ജോലി കുറച്ചു ഭുദ്ധിമുട്ടുള്ളത് തന്നെയാണ് .

മക്കള്‍ എത്രെയുണ്ട് എന്ന് ചോദിച്ചപ്പോള്‍ :"മൂന്നു മക്കള്‍ ഉണ്ട്,  രണ്ടു പെണ്മക്കളെയും കെട്ടിച്ചു ,ഒരു മകന്‍ ദുബായില്‍ ഉണ്ട് "

ഓഹോ എന്നിട്ടാണോ ഇവിടെ കിടന്നു കഷ്ടപ്പെടുന്നത്,  ദിര്‍ഹാത്തിനോടുള്ള ആര്‍ത്തി തന്നെ ,  മനുഷ്യന് വയസ്സാകും തോറും പണത്തിനോടും ദുനിയാവിനോടും ആര്‍ത്തി കൂടും എന്നല്ലാം  ഞാൻ  ആലോചിച്ചു കൊണ്ടിരിക്കുമ്പോള്‍ എന്റെ മനസ്സിലുള്ളത് വായിച്ചപോലെ അയാള്‍ പറഞ്ഞു . 

"മകന്‍ ഉണ്ടെന്നു പറഞ്ഞിട്ടു എന്താനു,  അവനെക്കൊണ്ട്‌ വീട്ടിലേക്ക് ഒരു കാര്യവും ഇല്ല ,ഓള് പട്ടിണി കിടക്കാതിരിക്കണമെങ്കില്‍ ഞാന്‍ തന്നെ അയക്കണം ,ഇങ്ങക്കറിയാലോ ഇവിടെ ഒരു ഫ്ലാറ്റിനു ഒക്കെ എന്താണ് വാടക എന്ന്,  അവന്‍ കെട്ടിയോളുമായി ആണ് ദുബായില്‍ താമസിക്കുന്നത് . കിട്ടുന്നതില്‍ ഫ്ലാറ്റ് വാടക കഴിഞ്ഞാല്‍ ഒന്നും ബാക്കിയുണ്ടാവില്ല എന്ന് എനിക്കറിയാം , ഈ ബില്ടിങ്ങില്‍ താമസിക്കുന്ന മലയാളികള്‍ ക്ക് കിട്ടുന്ന ശമ്പളത്തില്‍ നിന്നും ഫ്ലാറ്റിന്റെ   വാടക കഴിഞ്ഞാല്‍ പിന്നെ ബാക്കി അധികം കാണില്ല .

ഓരോ മലയാളികളും ഇവിടെ കിടന്നു പരക്കം പായുന്നത് ഞാന്‍ കാനാരുല്ലതല്ലെ ,ശമ്പളം കിട്ടിയ അന്ന് ഭാര്യയെയും കൂട്ടി ഒരു ഷോപ്പിംഗ്‌ അവിടെ കാര്‍ഡു ഒന്ന് ഉരച്ചാല്‍ തുടങ്ങും ആ മാസത്തെ ചിലവിന്റെ ഘോഷയാത്ര !!,പിന്നെ കറന്റ് വെള്ളം സ്കൂള്‍ വണ്ടി ഫീസ്‌ ,മാസാവസാനം കാര്‍ഡു ഉരസിയത് അടക്കാന്‍ ലോണ്‍ എടുക്കേണ്ടിവന്ന മലയാളി ഈ ബില്ടിങ്ങില്‍ ഉണ്ട് " അയാള്‍ പറഞ്ഞു നിര്‍ത്തി .

ഞാന്‍ സംസാരം മാറ്റാന്‍ ശ്രമിച്ചു ,''മരുമക്കള്‍ എവിടെയാണ് ?''

"അവര് രണ്ടാളും സൌദിയില്‍ ആണ് ,ഇളയതിനെ കെട്ടിച്ച വകയില്‍ ഭൂപണയ ബേങ്കില്‍ കൊറച്ചു കടം ഉണ്ട് അത് വീടിയാല്‍ വിസ ക്യാന്സലാക്കി പോണം എന്ന് വിചാരിച്ചിരിക്കുകയാണ് "അതും പറഞ്ഞു ഞങ്ങള്‍ ലിഫ്റ്റിലേക്ക് കയറി താഴേക്ക് ഇറങ്ങി പോകുന്ന ലിഫിറ്റില്‍ ഞങ്ങള്‍ ഒന്നും സംസാരിക്കാതെ നിന്ന് .

അയാളുടെ മുഖത്തേക്ക് നോക്കിയപ്പോള്‍ മനസ്സിലുള്ള ഭാരം ഇറക്കി വെച്ച ഒരു പ്രതീതി ആ മുഖത്തു പ്രകടമായി കണ്ടു ."എല്ലാം ശരിയാകും ഇക്ക പടച്ചോന്‍ കാക്കട്ടെ അസ്സലാമു അലൈക്കും" എന്നും പറഞ്ഞു ഞാന്‍ പിരിഞ്ഞു പോരുമ്പോള്‍ എന്റെ മനസ്സില്‍ മുഴുവന്‍ അയാള്‍ സംസാരിക്കുമ്പോള്‍ ഉണ്ടായിരുന്ന കിതപ്പിന്റെ ശബ്ദം അലയടിക്കുന്നുണ്ടായിരുന്നു

എന്‍റെ ഫൈസ് ബുക്ക് പോസ്റ്റുകള്‍ 11

June 1, 2017 · 

ദുബായ് സോനാപൂര്‍(മുഹൈസിന ) ഏരിയയിലെ ലേബര്‍ ക്യാമ്പുകളില്‍ ആണ് കൂടുതല്‍ ആന്ധ്രക്കാര്‍ ഉള്ളത് എന്നാണു എന്‍റെ ഒരു കണക്കില്‍ മനസ്സിലായിട്ടുള്ളത് .

എന്‍റെ നാട്ടുകാരായ രണ്ടു മൂന്നുപേര്‍ ആന്ധ്രക്കാര്‍ ഉള്ള നിര്‍മ്മാണ കമ്പനിയില്‍ ജോലി ചെയിതിരുന്നു .

ഗള്‍ഫിലെത്തി കുറച്ചു കാലം കഴിഞ്ഞാല്‍ ആശിച്ച പുരോഗതിയൊന്നും ഉണ്ടാവാതെ ഇരിക്കുമ്പോഴാണ് ,മതി നിര്‍ത്തി നാട്ടിലെന്തെങ്കിലും ബിസിനെസ് ചെയിതു കുടുംപത്തോടൊപ്പം ജീവിക്കാം എന്ന തോന്നല്‍ നമുക്ക് ഉണ്ടാകുക .

മേല്‍പറഞ്ഞ എന്‍റെ നാട്ടുകാരിലോരാള്‍ക്ക് അങ്ങിനെയൊരു ബിസിനെസ് മോഹം ഉദിക്കുന്നത് ഒരിക്കല്‍ നാട്ടില്‍ പോയി വന്ന സമയത്താണ് .

നാട്ടില്‍ നിന്നും അവനൊരു ബിസിനെസ് ഐടിയയും കിട്ടിയിരുന്നു .

അവന്‍റെ വീടിന്‍റെ തൊട്ടടുത്തുള്ള ഒരാള്‍ ചെറിയ പോത്ത് കുട്ടികളെ ചന്തയില്‍ നിന്ന് കൊടുന്നു, നല്ല തീറ്റയൊക്കെ കൊടുത്ത് കുട്ടപ്പനാക്കി .
ഭീമമായ ലാഭാത്തിനാണ് കൊടുക്കുന്നത് എന്ന ബിസിനെസ് രഹസ്യം മനസ്സിലാക്കിയത് മുതല്‍ അവനു ഉറക്കമില്ലായിരുന്നു .

നല്ല തടിച്ചു കൊഴുത്ത ലക്ഷണമൊത്ത പോത്തുകളെയാണ് , കുഞ്ഞുങ്ങള്‍ ജനിച്ചു പതിനഞ്ചാം ദിവസം കുട്ടിയുടെ മുടി കളയുമ്പോള്‍ ഞങ്ങളുടെ നാട്ടില്‍ അറുത്തു വിതരണം ചെയ്യാറ് .

ഈ ആവശ്യത്തിനുള്ള കന്നുകാലികളെ വാങ്ങിക്കുമ്പോള്‍ വിലയുടെ കാര്യത്തില്‍ വലിയ വിലപേശല്‍ ഒന്നും നടക്കാറില്ല .
പറഞ്ഞ കാശ് കൊടുത്ത് വാങ്ങിക്കും .
സാദനം ക്ലീന്‍ ആവണം എന്നൊരു ഡിമാന്റ് മാത്രമേ വാങ്ങിക്കുന്നവര്‍ക്കുള്ളൂ .
ഇങ്ങനെയുള്ള ആവശ്യങ്ങള്‍ക്ക് പോത്തുകളെയും കാളകളെയും വളര്‍ത്തിഎടുക്കുക എന്നതായിരുന്നു നമ്മുടെ സുഹ്രത്തിന്റെ ലക്‌ഷ്യം .

ഇവന്‍ ലേബര്‍ ക്യാമ്പില്‍ ഉള്ള ആന്ധ്രക്കാരോട് അവരുടെ നാട്ടിലെ കന്നുകാലികളുടെ വിലനിലവാരത്തെക്കുറിച്ച് ചോദിച്ചറിഞ്ഞപ്പോള്‍ മനസ്സില്‍ ഒരായിരം ലടു പൊട്ടിയിരുന്നു .

കുറച്ചു നാളുകള്‍ക്കു ശേഷം ആ കമ്പനിയില്‍ നിന്നും അവര്‍ ക്യാന്‍സല്‍ ആയി നാട്ടിലെത്തി .
അവര്‍ ബിസിനെസ് തുടങ്ങുവാന്‍ ഉള്ള ഒരുക്കത്തിലായി .

അവരുടെ കൂടെ ക്യാന്‍സലായി വന്ന ആന്ധ്രക്കാരുടെ അഡ്രെസ്സ് തപ്പിപ്പിടിച്ചു അവര്‍ ആന്ധ്രയില്‍ എത്തി .

നാട്ടിന്‍ പുറങ്ങളില്‍ കറങ്ങി പോത്ത് കുട്ടികളെ അന്ന്വേഷിച്ചപ്പോള്‍ തന്നെ അവരുടെ മനസ്സില്‍ ആഹ്ലാദം അലതല്ലി .

കാരണം എന്തെന്നല്ലേ ?

അവിടെന്നു കിട്ടുന്ന പോത്ത് കുട്ടികളെയൊക്കെ പത്തിരട്ടി വിലക്കാണ് നാട്ടില്‍ വില്‍ക്കുന്നത് .

അപ്പോള്‍ അതിനെ വലുതാക്കി വിറ്റാല്‍ കിട്ടുന്ന ലാഭം ഓര്‍ത്ത്‌ അവന്മാര്‍ ബോധം കെട്ടു വീണില്ലന്നെയുള്ളൂ !!.

പിന്നീട് അവറ്റകളെ കൊണ്ട് വരാനുള്ള മാര്‍ഗ്ഗങ്ങള്‍ ആരാഞ്ഞു .

കേരളത്തിലേക്ക് കൊണ്ട് വരണമെങ്കില്‍ കുത്തിവെപ്പ് എടുക്കണം ,
ഇതറിഞ്ഞപ്പോള്‍ അവിടുത്തെ മ്ര്‍ഗാശുപത്രിയുമായി ബന്ധപ്പെട്ടപ്പോള്‍ അത് വലിയ ചിലവൊന്നും ഇല്ലാതെ ശരിയാക്കാം എന്ന് മനസ്സിലായി .

പിന്നീട് ചെക്ക് പോസ്റ്റ്‌ കടക്കുന്നതിനെ കുറിച്ച് അന്ന്വേഷിച്ചപ്പോഴാണ് കണ്ട സ്വപ്നങ്ങളുടെ കോട്ടയെല്ലാം തകര്‍ന്നടിഞ്ഞത് .

അവസാനം അവര്‍ പദ്ധതി ഉപേക്ഷിച്ചു തിരിച്ചു ഗള്‍ഫിലെ പല സ്ഥലങ്ങളിലേക്കായി വീണ്ടും വിസയെടുത്ത് ജോലിക്ക് പോയി .

ഈ വിവരങ്ങള്‍ അറിഞ്ഞപ്പോള്‍ എനിക്കൊരാശ എന്ത് കൊണ്ട് ചെക്ക് പോസ്റ്റ്‌ കടമ്പ വളഞ്ഞ വഴിയിലൂടെ കയറിക്കൂടാ ?.

ഞാന്‍ ആ വഴിക്കുള്ള ആന്ന്വേഷണം തുടങ്ങി .

പലപ്പോഴും ചെക്ക് പോസ്റ്റ്‌ വഴി ചില്ലറ ഇടപാടുകള്‍ നടത്തിയ എക്സ്പീരിയന്‍സ് വെച്ച് അന്ന്വേഷിച്ചപ്പോഴാണ് സംഗതിയുടെ കിടപ്പ് അത്ര പന്തിയല്ലെന്ന് മനസ്സിലായത്‌ .

ആന്ധ്ര ,കര്‍ണാടക ,തമിഴ്നാട് എന്നിവിടങ്ങളില്‍ നിന്നൊക്കെ കന്നുകാലികളെ കടത്തുന്ന വമ്പന്‍ റാക്കറ്റ്കളെപറ്റി അറിയുന്നത് അപ്പോഴാണ്‌ .

നമുക്കും കന്നുകാലികളെ കൊണ്ടുവരാം പക്ഷെ പ്രോഫിറ്റില്‍ ഒരു പങ്ക് ഈ റാക്കറ്റിനു പോകും .
പിന്നീട് വലിയ മെച്ചമൊന്നും ഉണ്ടാകില്ല .

ഗ്രാമീണരുടെ കൈകളില്‍ നിന്നും തുച്ചം വിലക്ക് ഇവര്‍ കന്നുകുട്ടികളെ കൈക്കലാക്കും ,
പല സ്ഥലങ്ങളിലും ഗ്രാമീണരുടെ നാല്‍ക്കാലികളെ അവര്‍ക്ക് ചന്തയില്‍ കൊണ്ടുപോയി വില്‍ക്കാനുള്ള സ്വാതന്ത്ര്യം പോലും അവര്‍ക്ക് നിഷേധിച്ചിരിക്കുന്നു .

ചുരുക്കി പറഞ്ഞാല്‍ ആ പാവങ്ങള്‍ക്ക് അര്‍ഹിക്കുന്ന വില കിട്ടുന്നില്ല എന്നര്‍ത്ഥം .

അപ്പോള്‍, പറഞ്ഞു വരുന്നത് ,

നാല്‍ക്കാലികളെ കൈമാറ്റം നടത്തുന്ന ഒരു മാഫിയ ഇന്ത്യയില്‍ ഉണ്ട് ,കോടതിയേയും ഗവര്‍മെന്റിനെയും പര്‍ച്ചേസ് ചെയ്യാന്‍ ശക്തിയുള്ള മാഫിയ .

അല്ലാതെ ഇത് ഭക്ഷണ സ്വാതന്ത്ര്യത്തിന്‍റെ മേലെ ഉള്ള കടന്നു കയറ്റമൊന്നും അല്ല .
ഗോ സംരക്ഷണം ,ഹിന്ദു രാഷ്ട്രം എന്നൊക്കെ പറഞ്ഞു ജനങ്ങളെ തെറ്റിദ്ധരിപ്പിച്ചു മാഫിയകള്‍ തകര്‍ത്തു വാഴുന്നു .
പാവം കര്‍ഷകര്‍ക്ക് കണ്ണീരു തന്നെ ബാക്കി

പാവപ്പെട്ട ഗ്രാമീണരുടെ രക്തം ഊറ്റി കുടിക്കുന്ന വന്‍ മാഫിയകളെ സഹായിക്കാനുള്ള നിയമം ആണ് ഇപ്പോള്‍ കൊണ്ടുവന്നിരിക്കുന്നത് .

കര്‍ഷകര്‍ക്ക് അവരുടെ ഉരുക്കളെ സ്വതന്ത്രമായി വില്പന നടത്താനുള്ള ചന്ത ഉണ്ടാക്കി കൊടുക്കുകയാണ് ജനങ്ങളോട് അല്പമെങ്കിലും ഉത്തരവാദിത്വം ഉള്ള ഗവര്‍മെന്റ് ചെയ്യേണ്ടത് .

എന്‍റെ ഫൈസ് ബുക്ക് പോസ്റ്റുകള്‍ 10

 29.05.2016

അല്‍ഐനില്‍ ജോലി ചെയ്യുന്ന കാലം ,
തവാം അട്മിനിസ്ട്രെഷനില്‍ ഉണ്ടായിരുന്ന ഒരു അറബിയുമായി നല്ല അടുപ്പത്തില്‍ ആയിരുന്നു .
 
മലയാളികളെ അങ്ങേയറ്റം ഇഷ്ട്ടപ്പെടുന്ന അദ്ദേഹം ചില മലയാളവാക്കുകള്‍ സംസാരത്തിനിടയില്‍ കലര്‍ത്തി സംസാരിക്കുകയും ചെയ്യും .
 
ഒരിക്കല്‍ എന്നോട് അയാള്‍ക്ക്  ഒരു ഡ്രൈവറെ വേണം, മലയാളി ആവണം, ഇപ്പോഴുള്ള ഡ്രൈവര്‍ ക്യാന്‍സല്‍ ആക്കി നാട്ടില്‍ പോകുകയാണ് എന്ന് പറഞ്ഞു .
 
സ്വാഭാവികമായും നമ്മള്‍ ഇങ്ങനെ ഒരു വിവരം കിട്ടിയാല്‍ അറബി എങ്ങിനെ ഉള്ള സ്വഭാവക്കാരനാവും എന്ന് പരിശോദിചേ ഡ്രൈവറെ ഏര്‍പ്പാടാക്കൂ .
 
അന്ന് തന്നെ അയാളുടെ ഡ്രൈവറെ തവാം ഹോസ്പിറ്റലിനു അടുത്തുള്ള കൊ-ഓപ് സൊസൈറ്റിയില്‍ വെച്ച് കണ്ടപ്പോള്‍ കാര്യങ്ങള്‍ തിരക്കി .
അയാള്‍ പറഞ്ഞു, '' നല്ല കുടുമ്പമാണ് ശമ്പളത്തിന് പുറമേ എന്തെങ്കിലുമൊക്കെ കിട്ടും'' .

ആയിടെയാണ് സുലൈമാന് ഡ്രൈവിംഗ് ലൈസന്‍സ് കിട്ടിയത് .
അവനെ അറബിക്ക് പരിചയപ്പെടുത്തി കൊടുത്ത് .
പുതിയ ഡ്രൈവര്‍ അല്ലെ, എന്ന് അറബി ചോദിച്ചപ്പോള്‍ ,
 
അവനെ ഞാന്‍ ട്രെയിന്‍ ചെയിതു ശരിയാക്കി എടുത്തോളാം എന്ന് പറഞ്ഞു .
 
അറബി പറഞ്ഞു , ''ഓക്കേ കുഴപ്പമില്ല ഇപ്പോഴത്തെ ഡ്രൈവര്‍ പോകുന്നത് വരെ തോട്ടത്തില്‍ പോക്കും കടയില്‍ പോക്കും ചെയിതാല്‍ മതി .പിന്നീട് സ്കൂള്‍ ,ഷോപിംഗ് എന്നീ കാര്യങ്ങള്‍ക്ക് വീട്ടുകാരെ കൊണ്ടുപോകാം'' എന്ന് പറഞ്ഞപ്പോള്‍ എനിക്കും സമധാനം ആയി .
 
ഒരു ആറു മാസം കഴിഞ്ഞപ്പോഴേക്കും ഞാന്‍ നാട്ടില്‍ ഒന്ന് പോയി വന്നു .വന്നപ്പോള്‍ സുലൈമാന്‍ അവിടെ ഇല്ല .ദുബായില്‍ ജോലി കിട്ടി പോയിരിക്കുന്നു .
 
എന്നോട് അറബി പറഞ്ഞു ,''അവനു ദുബായില്‍ കൂടുതല്‍ ശമ്പളം കിട്ടുന്ന ജോലി ഉണ്ട് പോകണം എന്ന് പറഞ്ഞപ്പോള്‍ ഞാന്‍ പോകാന്‍ പറഞ്ഞു .''
 
ഭാഗ്യത്തിന് വിസ അടിചിട്ടില്ലായിരുന്നു .
   
  പിന്നീട് ആ അറബിയുടെ വീട്ടില്‍ വരുന്ന മലയാളി ഡ്രൈവര്‍മാര്‍ എല്ലാം ഒരു ദിവസം മാത്രം ജോലിക്ക് നില്‍ക്കും ,പിറ്റേ ദിവസം ജോലിയും വേണ്ട എന്ന് പറഞ്ഞു പോകും .
 
        ഞാന്‍ തന്നെ ഏര്‍പ്പാടാക്കിയ ഒരുത്തന്‍ ഇതുപോലെ പിറ്റേ ദിവസം ജോലി വേണ്ട എന്ന് പറഞ്ഞപ്പോള്‍ ഞാന്‍ കാര്യം തിരക്കി .

അപ്പോള്‍ അവന്‍ പറയുകയാ ,
''ബഷീര്‍ക്കാ അവിടെത്തെ ബാത്രൂമിന്റെ ഡോറില്‍ ,>> ''ഈ വീട്ടില്‍ വരുന്ന ഡ്രൈവര്‍മാരുടെ ശ്രദ്ധക്ക് ....... ,ഇവിടെ നില്‍ക്കേണ്ട ഇവിടുത്തെ തള്ള മഹാ മോശമാ..>>>..''' , എന്ന് എഴുതി വെച്ചിരിക്കുന്നു ''.
 
ഈ വിവരം കേട്ടപ്പോള്‍ എനിക്കുറപ്പായി അത് സുലൈമാന്‍ എഴുതിയതാണെന്ന് .
 
ഞാന്‍ സുലൈമാനെ വിളിച്ചു ,
നീ എന്ത് പണിയാണ് കാണിച്ചത് എന്ന് ചോദിച്ചപ്പോള്‍ അവന്‍ പറയുകയാ , 
''അത്..... ഒരു ദിവസം ടീവിയില്‍ ക്രിക്കറ്റ് കണ്ടിരുന്നു സ്കൂള്‍ സമയം ആയതു അറിഞ്ഞില്ല .സ്കൂളില്‍ നിന്നും കുട്ടികളെ എടുക്കാന്‍ വൈകിയതിനു അവിടെത്തെ തള്ള വഴക്ക് പറഞ്ഞു ,
 ആ ദേഷ്യത്തിന് എഴുതിയതാ ''.
 
ഞാന്‍ ഒരു പൈന്റ് പണി ചെയ്യുന്ന ബംഗാളിയെ വിളിച്ചു ആ ഡോര്‍ പൈന്റ് ചെയ്യിച്ചു .
 
പിന്നീട് ഫിറോസിനെ അവിടെ ഡ്രൈവര്‍ പണിക്കു വെച്ച് .
 
കൊല്ലം പതിനൊന്നായി ,ഇന്ന് മുറൂറില്‍ (ട്രാഫിക് പോലീസ് ) പോയപ്പോള്‍ ഫിറോസും അറബിയും അവിടെ .

പഴയ സൌഹ്രദം പുതുക്കുന്നുതിനിടയില്‍ അറബി ചോദിച്ചു ,
''എങ്കിലും എനിക്ക് ഇതുവരെ മനസ്സിലായിട്ടില്ല നീ എന്തിനാ അന്ന് ബാത്ത് റൂമിന്റെ ഡോര്‍ മാത്രം പൈന്റ് ചെയ്യിച്ചത് എന്ന്''

ഭാഗ്യം ചോദ്യം ഫിറോസ്‌ കേള്‍ക്കാതെ ആണ് ചോദിച്ചത് .

ഞാന്‍ അറബിയോട് പറഞ്ഞു .,
''ഞങ്ങള്‍ മലയാളികള്‍ തൂറാന്‍ ഇരിക്കുമ്പോള്‍ ഡോറിലെക്ക് നോക്കിയാണ് ഇരിക്കാറ് , അത് കൊണ്ട് അവിടം ഭംഗിയായി കിടക്കണം എന്ന് നിര്‍ബന്ധമാ ''.
അറബി ഒന്നും പറഞ്ഞില്ല .

ഇനി ഇത് വേറെ ആരോടെങ്കിലും ചോദിക്കുമോ എന്നൊരു പേടി ഉണ്ട് ..

മലയാളിയുടെ ബാത്രൂം സാഹിത്യം ദേര മാര്‍ക്കറ്റില്‍ പോയവന് മനസ്സിലാവും .
!!!!ഓസ്കാര്‍ കിട്ടും ഓസ്ക്കാര്‍ !!!!!

May 31, 2013 at 9:23am · 

ഇന്ന് ലോക പുക വലി വിരുദ്ധ ദിനം ആണത്രെ!! ,

ഇപ്പോഴങ്ങിനെയാണ് ഓരോന്നിനും ഓരോ ദിനം ,കച്ചവട താല്പര്യം ഇല്ലാത്ത ഒരു ദിനം ഇത് തന്നെയായിരിക്കും .
       
           ഞാന്‍ നല്ല ഒരു പുക വലിക്കാരന്‍ ആയിരുന്നു .
     പലപ്രാവശ്യം നാട്ടില്‍ പോകുമ്പോള്‍ വലി നിര്‍ത്തിയാണ് പോകാറു ,പക്ഷെ തിരിച്ചു വന്നാല്‍ വലി തുടങ്ങും .
പലപ്പോഴും പലരുമായുള്ള ചങ്ങാത്തം ആണ് വലി തുടങ്ങാന്‍ കാരണം. കൂട്ട് കൂടി ഇരിക്കുമ്പോള്‍ അങ്ങോട്ട്‌ വലിക്കും .
പത്താം തരത്തില്‍ പഠിക്കുമ്പോള്‍ ഉച്ചക്ക് ഒരു സിഗററ്റില്‍ ആണ് തുടക്കം.
 അതിനു പറ്റിയ ഒരു കൂട്ട് അവിടെയും ഉണ്ടായിരുന്നു കോളേജിലും പറ്റിയ കമ്പനി കിട്ടി.
 
ഇവിടെ(ഗള്‍ഫില്‍ ) എത്തിയപ്പോള്‍ പാക്കറ്റ് വാങ്ങി വലിക്കല്‍ തുടങ്ങി .
     റോയലില്‍ ആണ് തുടങ്ങിയത്. അത് വിലകൂടുന്നതനുസര്ച്ചു ബ്രാന്‍ഡില്‍ മാറ്റം വന്നു .
അവസാനം പൈന്‍ സിഗരെറ്റില്‍ എത്തി ,വില പിന്നെയും കൂടുന്നു. ഇവിടെ നികുതി വര്‍ദ്ധിപ്പിക്കുന്നതിന് അനുസരിച്ച് വില വര്‍ദ്ധിച്ചു കൊണ്ടിരിക്കും .
ടെന്‍ഷന്‍ കൂടുമ്പോള്‍ ആണ് വലി കൂടുന്നത് എന്ന് പറയുന്നു.
 ഒരര്‍ത്ഥത്തില്‍ ശരി തന്നെയുമാണ് ,എന്നാല്‍ വലിച്ചാല്‍ ടെന്‍ഷന്‍ മാറുമോ? ,ഇല്ല .
പിന്നെ കുറച്ചു സമയം ആ സിഗരെറ്റ്‌ വലിയുടെ ആനന്ദത്തില്‍ ഒരല്‍പം മറവി മറ്റുള്ള കാര്യങ്ങളില്‍ നിന്നും .
ചിലര്‍ പുക വലിക്കുന്നത് കാണാന്‍ നല്ല രസമാണ് ,സിഗരെട്ടു പിടിക്കുന്നത്‌ മുതല്‍ പുകയൂതുന്നത് വരെ പലര്‍ക്കും പല സ്റ്റൈല്‍ ആണ് .
ചിലരുടേത് ഞാന്‍ കൌതുകത്തോടെ നോക്കി നില്‍ക്കാറുണ്ട് .
സിഗരെട്ടു ചുണ്ടില്‍ വെച്ച് ജോലി ചെയ്യുന്ന ചിലരെ കണ്ടാല്‍ അതിലും കൌതുകമാണ് .
      എന്റെ നാട്ടില്‍ ഒരു മീന്‍ വില്‍ക്കുന്ന കോയാക്ക ഉണ്ട് ,പുള്ളി സിഗരെട്ടു കത്തിച്ചാല്‍ അത് തീരുവോളം വായില്‍ നിന്ന് എടുക്കില്ല. അതിനിടയില്‍ കച്ചവടവും ആള്‍ക്കാരുമായി വില പറഞ്ഞു തര്‍ക്കിക്കലും എല്ലാം നടക്കുന്നുണ്ടാവും. ഇടയ്ക്കു കണ്ണിലേക്കു പുകവന്നു കണണ് എരിയുമ്പോള്‍ നാവുകൊണ്ട് തന്നെ ചുണ്ടിലിരിക്കുന്ന സിഗരെട്ടിന്ടെ സ്ഥാനം മാറ്റും .
 
കഥ കൂടുന്നുണ്ടോ ?
ഇനി കാര്യത്തിലേക്ക് കടക്കാം ,ഞാന്‍ ഒരു ദിവസം സിഗരെറ്റ്  പെക്കറ്റ്  എടുത്തു വലിക്കാന്‍ നോക്കുമ്പോള്‍ അതില്‍ ഒന്നേയുള്ളൂ ,
കയ്യില്‍ ചില്ലറ പൈസ ഒന്നും ഇല്ല .
ഉള്ളത് ഒരു അഞ്ഞൂറിന്റെ നോട്ടും  .

        എന്തായാലും ആ ഒന്ന് വലിച്ചു കൊണ്ടിരിക്കുമ്പോള്‍ ഒരു ചിന്ത മനസ്സില്‍ കയറി കൂടി കാശാണല്ലോ ഈ പുകയായി പോകുന്നത്. ദിവസം മൂന്നര ദിര്‍ഹം !.
 പത്തു ദിവസം മുപ്പത്തഞ്ചു !!,മാസം നൂറ്റി അഞ്ചു ,ഒരു വര്‍ഷം 1260 ദിര്‍ഹം!! .ഒരു സിംഗിള്‍ ടിക്കറ്റും അത്യാവശ്യ സാധനങ്ങളും വാങ്ങിയാല്‍ നാട്ടില്‍ പോകാം .
അപ്പോഴേക്കും ആ സിഗരെറ്റ്‌ കത്തി തീരറായിരുന്നു .
        അത് കുത്തി കെടുത്തി ദൂരേക്ക് എറിഞ്ഞു വായ് കഴുകി റൂമിലേക്ക് കയറി .

  '''ഇനി വലി ഇല്ല '''.